【Now財經台】睇返港股近期表現，似乎冇咩股份揀得落手，喺成本高、原材料價格貴、經濟放緩、通脹勁大環境下，唔識投資外圍嘅散戶，想喺港股「尋寶」場，應該點揀好？
黃國英資產管理公司董事黃國英指，基本消費品股係有得諗，因為依家普遍都加到價，加上原材料價格有壓力，但相關股選擇唔多，喺上個月顯著跑贏大市下，估值已經唔平，如果買外圍呢類股係平香港好多。
Alex又話，基本消費品股主要睇類別及品牌，以農夫山泉(09633)為例，由於產品售價較平，加價相對容易，加幅對消費者嚟講未必太起眼。佢提醒宜避開中產可選性消費類別，例如體育用品股，如果經濟差，呢啲產品係屬於可買可唔買，所以揀比較低價、飲食類別嘅基本消費品股會比較好。
黃國英又認為，大型科技股、車股及鋰相關股亦值得考慮。
