【Now財經台】中國平安(02318)今朝低開後,一度跌逾3.7%,低見44.4元,計及除淨因素,距離3月中即市低位43.99元水平,差少少就要破底。至於平保A股亦弱勢,暫時連跌5日,跌至5年低位,依家AH股溢價僅6.6%。
平保股價已跌至保歷加通道底,後市要留意守唔守得住3月中低位,RSI跌至33水平,開始出現超賣,雖然之前跌到呢啲位都有得彈,但由於蟹貨重重,隨時可能係「彈‧散」格局,後市要睇實8月23日公布嘅中期業績,同埋公司係咪會再出手回購,仲有受疫情封控影響,新業務價值表現、喺內房危機下撥備水平如何,瑞信估計,平保上半年新業務價值按年跌近30%,要留意最終係咪好似預期咁差。