【now.com財經】今朝揀咗隻恒指熊(63206)出嚟，講明直接出動都不為過，以今朝Patreon出文時間為10點20分，同樣地先用10分鐘時間刨文，再用10分鐘時間入市，即(63206)由10點30分至40分呢段時間落場，按期內高低位做過0.112元/0.109元計，平均買入價為0.1105元。
其後指數以樹懶嘅速度向下再落，行到上半場低位19,515點，本以為重貨區即將被全家抄斬之際，仁慈嘅淡友竟然放過呢15點，上天果然有好生之得，而同時受到樹懶速度影響，五分鐘圖上嘅保歷加通道都開始見收窄，淡倉仍然在手嘅唯一值博率，變成以堅持企喺保歷加下降通道之內等保歷加通道口再次拓闊，當係比指數稍稍喘定之後再向下瀡多鍋。不過，最後於11點45分見到指數忽然上破保歷加通道中軸，Slow STC(14,3)早已出現觸底走勢，望望隻(63206)高低位做過0.109元/0.107元，平均買即係0.108元，對比平均買入價捱緊兩至三格。乃念(63206)收回價20,555點，同恒指現價有成900幾點差距，更何況捱兩至三格嘅幅度都尚算亨鬆，就頂住先。
如常地餵過我家肥貓同我自已食飽之後，休息一陣下半場開市，指數跌幅再見收窄，而喺作戰室裡面嘅戰友，即市淡倉基本上大部份人都已經收割咗。
依家1點10分，去完個廁所出返嚟之後見到指數跌縮進一步收窄到466點，喺五分鐘圖上見指數承上半場重上保歷加上升通道嘅走勢，再踩住50分鐘線(五分鐘圖10線)同100分鐘線(五分鐘圖20線)向上，保歷加通道口都有拓闊。正常擔心隻(63026)點算好嘅時侯，換個小時圖出嚟見指數雖然有稍稍抽高嘅走勢，但整條保歷加通道仍然向下，底線仲要「直筆甩」、45度角斜落指住低位，(63206)就當我忍一忍你喺下行期間，好友嘅無謂嘅爭扎(嘿)。
阿西，台灣嘅珍奶味道唔錯，咁夜落機食碗牛肉麵醫下肚亦非常Ok，為咗你個胃(同我哋廣大淡友)著想，can try。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
