【Now財經台】樂享集團(06988)早市一直錄得升幅，但午後走勢急轉直下，一度急瀉逾63%，低見0.92元，由蚊股慘變毫子股，並7度觸發市調機制，須進入「冷靜期」，收市上返1元以上水平，報1.31元，大跌逾48%。
樂享午後大冧，但其實冇重大不利消息傳出，但值得留意係，北水喺7月26日開始，連續4日減持樂享，合共減持800萬股，今日成交股數有逾3.6億股，佔已發行股數約15%，但由於公司股權極度分散，仍未知係北水加大沽貨力度，還是有股東「唔守承諾」掟貨，要留意聽日北水持股會唔會有啟示。
樂享今日插穿250天線，14天RSI亦落到13嘅極超賣水平，但投資者都唔好心急撈底，睇下公司有冇進一步公布。
