【Now財經台】內房、物管股今日繼續尋底，當中以物管股金科服務(09666)跌得最甘，一度急瀉逾37%，可能同集團擬向喺A股上市嘅母企金科股份授出15億人仔貸款，市變相向母企「輸血」有關，但其實呢筆貸款有抵押之餘，更要收8.6厘年息，市場係咪反應太大？
《香港股票財技密碼》作者梁杰文指，唔可以怪投資者反應過大，因為依家市場對內房、物管股嘅投資環境及信心都非常薄弱，睇返昔日龍頭中國恒大(03333)，早前曾出咗獨立調查報告，發現旗下子公司有逾百億資金被母公司挪用，市場自然會將兩者比較，講得好聽啲，今次金科係向母公司「輸血」，亦有足夠抵押品及收高息，但見到規模、實力更大嘅內房都要冧，難免令人擔心呢筆錢最終收唔收得返，所以投資者會抱先沽為上嘅心態，唔想再等。
