【Now財經台】力高健康生活(02370)噚日尾市10分鐘閃崩，收市暴跌逾80%，之後公司出通告，話股價波動原因不明，強調業務營運正常，雖然公司嘅解說好正路，但股價今朝照大幅反彈，一度高見6元，勁彈逾91%。
力高健康上市唔夠4個月，如果用噚日未大跌前高位18.5元計，公司PE高達115倍，明顯太貴，值得留意係，公司股權高度集中，大股東力高集團(01622)揸住75%，而80名國際配售投資者約持有4000萬股，即係市場流通股數僅約1000萬股，噚日尾市成交股數約800萬股，好大機會係機構投資者沽貨，由於股權集中，股價波動可以好大，建議趁反彈想博一博嘅投資者要注意風險。
