【Now財經台】總結截至早上11時止，1小時內《彭博》用戶關注度上升最多港股，依次為中國海外發展(00688)、國泰航空(00293)、華潤置地(01109)、中國恒大(03333)、龍湖集團(00960)。
內房「爛尾樓」房貸斷供事件踏入第3周，市傳上周由國務院總理李克強召開的國務院常務會議，已拍板批准成立最多3000億人仔房地產基金，協助12家房企及部分政府選定房企，帶挈內房、物管股今日自低位反彈，不過，中央今次出手，係咪真係可恢復到買家及市場信心？
富昌證券聯席董事譚朗蔚指，過去房地產市場有好多針對業主、房地產、發展商、銀行嘅政策出台，但都提振唔到市場需求，依家「爛尾樓」斷供亦唔見得會有新資金流入，所以用資助解決個別房企困難，其實都係杯水車薪，由於債務問題背後牽涉多家房企，如果唔公布邊家房企受惠，投資者亂咁搵龍頭，或較「健全」嘅內房撈底好易搵錯，因為過去有唔少睇落穩陣嘅內房，股價一直係咁跌，投資者無謂火中取栗。
