【Now財經台】騰訊控股(00700)係主要股東嘅中國儒意(00136)，股價今朝高開2%後，升幅一度擴大至6%，高見2.65元，但開市15分鐘後「跳水」，尾市更刷新日內低位，低見2.41元，跌3.6%，收市報2.43元，跌近3%，全日成交金額逾1.4億元。
中國儒意噚晚出通告主動披露有關首款手遊《亂世逐鹿》嘅好消息，但投資者似乎傾向趁好消息出貨，雖然今日下晝商務部話會擴大遊戲審核試點，唔少遊戲股升幅擴大，但中國儒意就冇跟隊升。
睇返技術走勢，中國儒意上周五復牌，雖然有騰訊成為大股東呢個消息，但股價衝高回落，最後更要倒跌，中國儒意近日亦只係守住2.4元配股價，投資者宜睇定啲再諗諗點部署。
