【Now財經台】洛陽鉬業(03993)上周四收市後發盈喜，預告中期多賺最多75%，但股價要到今個星期先開始慢慢反映，到今日先有較大升幅，其實洛鉬股價連升幾日，同盈喜嘅關連性有幾大？
耀才證券研究部總監植耀輝指，洛鉬第2季利潤比第1季更好，同公司收購或擴大生產市場有一定關係，大行睇好洛鉬未來5年產出可能錄得40%至50%強勁增長，喺產能不斷提升下，盈利一定相應增加，雖然洛鉬位於剛果民主共和國嘅礦場暫停銅、鈷出口，但對股價似乎冇乜影響，原因係類似事件已經唔係第一次發生，只要有額外資金與當局和解，或達到特定要求，相信礦場就可以重開，所以洛鉬股價彈咗幾日，仲價量齊升。
