【Now財經台】喺柬埔寨做博彩生意嘅金界控股(03918)，上半年轉賺5270萬美元，中期收入按年增長86%，單計第2季就按季多賺逾39%。金界中期業績大致符合預期，點解股價今日反應咁大，係咪業績有好大亮點？還是有其他原因？
華盛証券分析師聶振邦指，金界業績的確有亮點，首先係成功扭虧為盈，對應返第1季收入同比增長差不多達40%，對市場嚟講係有驚喜，雖然疫情反覆，但第2季仍錄得環比增長，一定對股價有支持，其次係地域上嘅分別，澳門及柬埔寨都喺東南亞，依家澳門賭業比較疲弱，反觀柬埔寨賭場有起色時，原本流入澳門賭業股嘅資金，就會轉投金界。
