【Now財經台】異動股有隻毫子股中國唐商(00674)中午前升幅顯著擴大，逆市急升。十分鐘即市圖到睇到，股份逆市高開15%，中午前繼續有得升，並且成交增加，下午返黎股價最多升近1.4倍，高見0.27元，收報0.197元，升74%。
中國唐商控股股東及第二大股東齊齊以高溢價增持，兩大股東持股合共增至逾70%水平，難怪今日股價咁強勢。中國唐商主要從事物業發展及物業分租業務，屬於內房一員，至少過去4個財年都係蝕錢，直至上一個財年先轉虧為盈，但都只係賺約800萬。
股份平日成交淡靜，上月尾盈喜股價曾急升7.6倍，現價又遠高於帳面值，私有化誘因不大，但兩大股東齊齊有動作，應該唔會係巧合，可以繼續留意。不過，假如公司遲遲無再公布後續發展，小心股價又會碌番落去。
