【Now財經台】去年初上市，號稱癌症篩查第1股嘅諾輝健康(06606)，上星期五收市後發盈喜，預期上半年收入最多增4.3倍，毛利率亦大升。諾輝上晝喺成交顯著增加下，愈升愈有，上晝一度高見28.1元，升近16%，下午返嚟升幅一度收窄，成交股數較過去100日同時段平均增逾3倍，成交金額已逾1.2億元。
諾輝發盈喜前股價已偷步升，上周市況轉差，其他B仔股都要回調，但諾輝股價仍可以跑贏，睇返技術走勢，造緊大圓底回升，但多次反彈到28至30元水平都有幾大阻力，睇下之後有冇更多利好消息，可以幫到股價。
此外，諾輝喺去年嘅年報提及，公司應該仲有2項候選產品，分別處於早期及後期開發階段，而呢啲新產品嘅進展，相信都有望成為股價催化劑。
