【Now財經台】內房危機蔓延至內銀及物管,華南城(01668)今早開市前公布最新1宗交易,涉及出售物管業務深圳第一亞太物業管理50%股權,買家係背後有深圳國資委作為大股東嘅深圳特區建設發展集團,作價逾12億人仔,折合逾14億港元,但點解股價今日冇乜反應?
《香港股票財技密碼》作者梁杰文指,表面睇,交易作價係好吸引,內房股近年因債務問題,或市場再融資情況,導致要不斷「伸手」集資,或者透過積極處置旗下資產,希望盡快補充資金還債,對內房嚟講,透過出售旗下公司集資係常見手段,而焦點會落喺交易作價,華南城股價今日冇明顯彈高,相信係交易細節或條款令市場唔收貨,雖然交易作價逾12億人仔,但認沽期權、認購期權相關條款,令投資者覺得即使交易落實都唔太樂觀。