【Now財經台】上市唔夠兩個月，主要做檢測服務嘅雲康集團(02325)噚日收市後發盈喜，預期中期多賺40%至50%，不過，雲康股價今朝先升後跌，但跌幅唔算大，以暫時高位，高開逾3%後，好快就掉頭向下，一度倒跌近3%，低見17.2元。
雲康以7.89元上市，掛牌初期一度「潛水」，但好快已重拾升勢，上周仲創過19.18元嘅上市新高，較招股價升逾1.4倍。
新股市場氣氛持續轉差，可能都對雲康股價有影響，值得留意係，集團股權非常集中，兩大主要股東加埋已持股74%，呢樣可能係業績理想外，另一個股價硬淨嘅原因。
