【Now財經台】截至早上11點止，1小時內《彭博》用戶關注度上升最多港股，依次為中國華融(02799)、石藥集團(01093)、中國銀行(03988)、濰柴動力(02338)、龍湖集團(00960)。
華融上榜應該同旗下一隻美元永續債，錄得15個月以來最大單日跌幅有關，據《彭博》數據顯示，呢隻4.25厘息嘅永續債，前日下晝急跌至75美仙，華融今日回應《彭博》查詢，指公司經營正常、流動性穩健，又指所有境外債都冇違約，集團去年落實重組，引入中信集團等戰略投資者，但股價復牌急挫後一直冇起色，係咪市場仍擔心集團財務狀況？
大華繼顯執行董事梁偉源指，雖然美元永續債曾急挫，但今朝《彭博》報出嚟嘅參考價，已幾乎重上急挫前水平，亦未見跟股份有關嘅消息，睇返華融其他美元外債，其實近期債價未見明顯波動，因此，Steven相信，美元永續債急挫應該跟個別沽盤沽低債價有關。
