【股市脈搏】呢隻化肥股發盈喜衝高後倒插

【Now財經台】中國心連心化肥(01866)出咗盈喜，但股價先升後跌，高開逾3%後，好快就轉跌，而且愈跌愈多，一度大跌逾8%，低位曾見5.36元。

心連心噚日收市後發盈喜，預期截至6月底止六個月，最少多賺40%，集團指，產業鏈轉型升級，令相關產品多元化發展，加上糧食價格飆升，推高化肥及化工品銷量及價格，不過，市場似乎都唔收貨，股價錄得近2個月最大單日跌幅。

心連心今日一跌，3月至4月嘅升幅蒸發咗大半，今日開緊第2枝陰燭，仲失守250天線，短線要留意前低位，即4.8元至4.9元水平。