【Now財經台】交易所買賣基金即ETF的互聯互通，今日起正式啟動，其實北向多選擇，南下落嚟資金得4隻香港上市ETF可以俾北水買到，分別係盈富基金(02800)、恒生中國企業(02828)、南方恒生科技(03033)及安碩恒生科技(03067)。ETF通啟動後，對進一步活化本港ETF市場發展有幾大幫助？
Global X ETFs資深投資經理霍浩華指，睇返港交所數據，5月ETF佔大市成交9%左右，現時大約有160隻ETF喺香港上市，其實只有23隻被歸納為追蹤香港股票。有好大誘因點解好多ETF發行商希望大力發展香港ETF市場，因為依家超過60%ETF持有人都係機構投資者。如果南向通經過一段時間，對投資者教育之後，相信內地好多零售投資者會對於香港ETF產品興趣愈嚟愈大，有望增加好多活力，所以雖然暫時喺成交方面唔會見到好顯著嘅幫助，但相信長期影響係非常之深遠。
