【Now財經台】維他奶國際(00345)自1994年上市以來，全年業績首度「見紅」，蝕1.58億元，集團又唔派息，午後股價跌幅一度擴大至近6%，睇返維他奶呢份業績，除咗蝕錢外，仲有冇其他隱憂？
華盛証券分析師聶振邦指，維他奶股價下晝跌多咗，主要受業績消息影響，股息方面，2020及2021財年都派32仙，即使股價跌，股息率都唔夠3厘，投資者多數以賺價為主，唔係好在意收息，所以維他奶唔派息未必對股價有好大影響，反而業務前景唔明朗更關鍵，雖然內地封城措施暫告一段落，但內地經濟復甦對帶動維他奶銷情反彈有幾大幫助，呢個不確定性先係令投資者卻步嘅主因。
