我的股票

    名稱 現價 升跌

    資料報價延遲十五分鐘

    【盤房來料】資金炒股唔炒市 股仔續禾雀亂飛

    【分析】 信報財經新聞 2022/06/23 14:31

    【信報財經新聞】隔晚美股表現反覆,早段三大指數低開,其後隨住鮑爺出席聽證會又上大落,最終三大指收都係報跌散場,步入熊市後嘅美股,單日波幅擴大,並出現日升日跌嘅反覆狀況,而三大指數反彈力度正在減弱。至於港股噚日跌逾500點後,今早反彈,但20日線(21245點)仍未能企穩。

    恒指高開149點,最多升280點,見21289半日高位,但仍受制20日線,升幅幾乎抹去僅餘2點,見21010半日低位。不過日A股做好帶動恒指回升,半日升200點,報21209;國指升91點,報7426;恒科指升64點,報4617。半日成交額縮水至593.1億元,反映現水平資金入市並不積極,尤其係重磅股風頭被細價股搶去,缸邊友炒股唔炒市,集中去炒三四線股仔。

    藍籌股普遍向上,下跌股份19隻,其中以中電(00002)表現較差,今早再創52周低位,半日跌近1%,報收65元。港交所(00388)半日微跌0.2%,友邦(01299)跟大笨象(00005)則分別升0.5%及0.7%。已經唔知第幾次再傳阿里(09988)旗下螞蟻集團重啟IPO,一時又話搵咗投行顧問,一時又話交咗申請,一時又話內地監管機構未審批其上市申請,一時又話開綠燈無問題,總之就三兩日傳一次有關消息。雖然狼來了咗咁多次,但市場傾向相信螞蟻集團上市係遲早嘅事,加上阿里現價估值便宜,總有資金願意買入,令阿里今日成為交易金額最高股份,半日股價升逾4%。

    汽車股又有阿爺幫手催谷,國常會確定加大汽車消費支持政策,研究免徵新能源汽車購置稅政策年底到期後延期問題,消息利好汽車股。吉利(00175)半日升7.5%,係表現最好藍籌股,股價更升至3個月高位。理想汽車(02015)再創本港上市新高,半日再升近一成,其他汽車股閒閒地升5%或以上。而汽車零件股加勁科技(00588)發盈喜,半日升逾一成,其他相關股份亦錄得可觀升幅。

    阿Man早喺上個月已表現,航運股炒作已屆尾升,有貨見好要識收,尤其受經濟陷入衰退威脅下,航運費已見頂,難以長期高企,下半年甚至調頭回落。事實上,過去一個月波羅的海乾散貨指數(BDI)已累積一定跌幅,隔晚指數更再跌逾半成,航運股今日捱沽。對BDI最敏感的太平洋航運(02343)半日插7.6%;東方海外(00316)半日亦跌7.2%,藍籌之中跑第尾。其他板塊內股份,普遍跌逾3%或以上。東方海外成為藍籌之後,股價偏偏停滯不前,如今喺航運股或由盛轉衰,步入另一個周期下,未知東方海外會否一如過去年幾以嚟,成為藍籌嘅股份一樣,市值大縮水。以航運股趨勢嚟睇,東方海外似乎都難打破呢個宿命。

    麥狄文
    (徐狄怡‧證監會持牌人)

     

    想睇更多財經消息