【Now財經台】華潤醫藥(03320)獲摩笛唱好,評級上調至「增持」,目標價亦調高至7元,潤藥今早升勢凌厲,平開後好快就發力向上,一度勁大逾15%,高見5.16元,其後升幅收窄。
今次係摩根士丹利分析員最少2年以嚟首次畀「增持」評級,又話潤藥製造業務收入前景有改善,內地低息環境亦有利分銷業務,估計集團收入及純利喺2021至2024年嘅複合年均增長率達13%同12%,跑嬴同業,又話集團今年嘅業務可以「重新出發」,風險回報係醫藥分銷股之中最好。
潤藥今朝一枝大陽燭升穿保歷加通道頂,而通道有擴闊跡象,對上一次出現呢個情況係今年初,當時14天RSI上到超買水平,之後就回調,雖然14天RSI暫時仲未超買,但要小心歷史重演。