【now.com財經】今朝揀定隻恒指熊(52145)出嚟，係屬於遠熊，目的用於以日線圖Trade返指數向保歷加通道底線，再向下博殺牛證街貨，因為呢兩日指數裂口開完市之後都真係Keep住橫行至收市咁滯，今日好少少，作戰室喺一個朝早先好後淡總算正數，但事實唔係個個都可以咁樣坐喺電腦前面做Day Trade，所以揀隻(52145)就係咁解。
等咗成朝，恒指低開後有見高走，見半日收市報20,876點，跌幅收窄至191點就知，但喺五分鐘圖上見，Slow STC(14,3)最多都只係上到50至60幾呢個中軸水平，連70嘅超買級入門都未掂過，(52145)成朝都只能坐喺後備席度等落場。
Lunchtime收到通知可以去拎貨，係呀，早幾日幫我家肥貓買咗塊新嘅爪爪板，落樓去攞貨時收到前輩Message，話我知「美股期貨升返接近300點了，同埋聽講昨晚美股有些好倉被夾爆了」，收到，多謝提醒，(52145)可以即時放入雪櫃(好彩出唔到)，但我都係要拆開新嗰塊爪爪板比我家肥貓開心咗先。
下半場開始之後，見指數喺首五分鐘已經一支「大陽燭」向上抽高，頂返住保歷加通道頂線，拿拿聲喺作戰室揀咗隻好倉出嚟之後，五分鐘圖已經見保歷加通道口拓闊，指數再向上迫高，依家1點9分，恒指跌幅大為收窄至得返跌37點，報21,030點，即市再追好倉嘅，或者下一關就係要指數上破500分鐘線(五分鐘圖100線)，不過作戰室都已經有戰友手快大咬好倉一咬。
依家1點17分，喺五分鐘圖上見指數暫時於500分鐘線前有行人止步嘅情況，同時見到Slow STC(14,3)喺五分鐘圖上上到超買水平，係知道美期Chur爆倉，但人總係覺得偷食先至最好味，吼呢個位出隻(52145)亦都符合今朝出(52145)嘅策略，按1點15分至1點25分期間出隻(52145)，期內高低位做過0.088元/0.078元計，平均買入價為0.083元。
嚟到依家1點37分，喺五分鐘圖上見指數喺500分鐘線同250分鐘線(五分鐘圖50線)夾緊，Slow STC(14,3)兩線又處於中軸喎，唉，唯有嗌多兩聲，等佢跌多兩格，爬下格仔走人算啦。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
想入作戰室？Click呢度就得：https://www.patreon.com/cbbcwar
