【Now財經台】大和認為，京東健康(06618)喺封控期間，網上醫院及網上藥物定單收入都有增加，係封控政策下嘅主要受惠者，大和又估計，當內地宏觀形勢好轉，京東健康股價將「強勢回歸」，京東健康、阿里健康(00241)及平安好醫生(01833)3大網上醫療股中，似乎京東健康可以秤先啲。
紅蟻資本投資經理李澤銘指，面對疫情，尤其上海封城，客戶畀咗錢，但件貨係咪可以送到手係關鍵問題，京東健康及阿里健康都有自己嘅物流網絡，阿里仲有第三方物流，但睇到喺封城期間，京東健康明顯更有優勢，成功提升市場分額，相信疫情過後，亦唔會出現大流失嘅情況，所以呢3隻網上醫療股之中，睇發展趨勢京東健康的確係最佔優。
