【Now財經台】近排巨型科企有資金追捧，今日有隻軟件毫子股飛魚科技(01022)跑出，今朝高開後走勢平穩，去到10點半左右開始發力，下晝升幅進一步擴大，一度高見0.92元，飆1.78倍，其後升幅收窄，成交股數較過去100日同時段平均飆逾110倍。
集團計劃今年推5至6款針對國內及國際市場，自主研發嘅新手機遊戲，其中《保衞蘿蔔四》及《神仙道三》，係集團熱門遊戲，主打嘅RPG遊戲《斗詭》亦準備推出，留意呢啲新Game係咪可以為集團業務帶嚟支持。
飛魚科技14天RSI上到89嘅嚴重超買水平時有沽壓，開咗條好長嘅上影線，如果冇乜實質消息推動股價再上，小心有回調風險。
