【Now財經台】雲音樂(09899)及商湯(00020)上市約半年，雲音樂嘅股份禁售期今日屆滿，商湯就會喺6月底「解禁」，雲音樂今日一度急挫逾21%，低見69.5元，商湯就暫時連升第五日，一度升逾6.6%，高見5.95元。
雲音樂股價上星期四突然抽高，一度飆近57%，但今日禁售期一到，即刻散晒，仲錄得上市以來最大跌幅。
至於商湯就有9名基石投資者，包括上汽香港、香港科技園創投基金等，當日入股每股成本價3.85元，以現價計賺超過50%，有機會成為「解禁日」嘅沽貨誘因，如果跟風炒「解禁」，要睇住6元至6.5元呢個密集蟹貨區，因為阻力會比較大。
