【專家分析】B仔股康方有機見2字頭

【Now財經台】舊年一場中概股股災，生科股成板自高位碌晒落來，B仔股康方生物(09926)噚日「入摩」，成為MSCI中國小型股指數一份子，此外，集團之前出通告建議發購股權，呢啲消息同股價近日大升，「上返水面」有冇關係？

華盛証券分析師聶振邦指，通告對股價影響唔係咁大，發購股權係無條件發比公司內部人士，屬於零成本，而揸住呢啲股權嘅人，用行使價轉換先會對公司產生注資效益，但依家都只係初步安排，仲要經股東大會表決，所以應該唔係股價近日抽高嘅原因。

聶Sir又話，康方將會出席全球規模最大嘅腫瘤學會議，呢啲消息都有利股價向上，今個月目標睇18.5元至19元，如果大市氣氛好更有機會見20元。