【Now財經台】上海連出50招振經濟全面復工復產，刺激內需股造好，其中酒吧股海倫司(09869)走勢好搶鏡。
海倫司今日高開逾6%後，升幅不斷擴大，尾市再試日內高位，最多升逾15%，高見12.58元，收市升逾14%，報12.44元，連升3個交易日。
舊年受疫情影響，雖然海倫司全年收入多咗，但都要蝕2.3億人仔，不過，市場憧憬今年下半年會出現強勁復甦，股價今日喺大成交配合下抽升，更重上50天線 ，係三個月以來首度升穿保歷加通道頂，14天RSI就喺60水平，暫時唔算超買，但上方有唔少阻力，包括13.3元及14.7元，後市要留意資金係咪持續湧入，提供足夠動力推升股價。
