【Now財經台】東正金融(02718)日前獲內地上市嘅上汽集團入主，並以每股大約1.243元提全購。今日復牌後股價大升，開巿後一度衝上1.28元，其後升勢回順，大部分時間都在約1.2元徘徊，成交股數亦較過去100日同時段平均成交增加40倍，金額超過2000萬元。
睇返公司背景，東正金融係由汽車經銷商正通汽車(01728)喺2019年分拆上市嘅汽車金融公司，正通之前因為財困，拍賣持有全數71.04%東正金融股權，股權由上汽集團以大約19億港元投得，即每股約1.243港元。換言之，上汽集團一躍成為東正嘅大股東，上汽按上市條例以同樣每股1.243元提全面收購，作價較停牌前大溢價25%。
大溢價全購後，東正復牌價量齊升，今日高位仲超過全購價。控股股東由原本陷債務危機嘅正通換上內地四大汽車製造商之一嘅上汽，令巿場對東正金融的前景都有返憧憬，有機會增加生意，扭轉虧損。嚟緊可以留意上汽能唔能夠為東正金融帶來實質嘅業績改善。
