【Now財經台】美股市況持續波動,其中標指已連跌7周,錄得20年以嚟最長跌浪,上星期五更一度「見熊」,至於道指更連跌8個星期,係1923年以來首次,亦係最長嘅跌浪,環球通脹升溫憂慮持續,聯儲局下次議息會議愈來愈近,同埋美國公司業績唔掂拖冧股價,美股今輪跌浪反映晒呢啲利淡因素未?
星展銀行(香港)豐盛私人客戶執行董事鄧威信指,標指預測市盈率(PE)已回落至17倍樓下,相信已經反映咗大部分負面因素,加上美國經濟數據仍然強勁,其中就業、零售數據都有唔錯嘅表現,雖然通脹拖累部分企業嘅盈利,但相信現時嘅估值已反映咗好多負面因素。