【Now財經台】新冠疫苗股今日普遍造好，不過，新冠口服藥股就個別發展，不過，只要呢啲公司話藥物、療法有進展，股價就好易錄得雙位數升幅，例如日前嘅亞盛醫藥(06855)，同埋今日嘅康希諾生物(06185)，不過，新冠藥概念一向短癮，投資者傾向有糊就食，不論疫苗還是口服藥相關股，炒作空間係咪已大不如前？
紅蟻資本投資經理李澤銘指，早前輝瑞、BioNTech及Moderna嘅股價，同高位比較已近乎「腰斬」，即使近期有反彈，都只係1、2日貨仔，疫情嚟到呢一刻，雖然病毒傳播力大增，但殺傷力已經低咗好多，歐美已解除大部分防疫措施，亦少咗「谷針」，加上愈來愈多歐洲國家撤銷疫苗通行證，未來新冠口服藥及特效藥需求應逐步減少，除非未來病毒殺傷力大增，否則，相關股份嘅炒作及上升空間都未必好大。
