【Now財經台】煤炭股今日強勢，其中兗礦能源(01171)升幅較顯著，連同系內股份兗煤澳大利亞(03668)價量齊升，兗礦今朝輕微高開，午後不斷刷新日內高位，一度高見24.6元，升近10%。
今日成個板塊炒起，主要係國內外都傳嚟利好煤炭業嘅消息，包括發改委最新話要推動煤炭「增產增供」，而國務院總理李克強就話，今年要杜絕去年暑假出現嘅「拉閘限電」，外圍方面，歐盟計劃未來5至10年增加用煤發電，以減少對俄羅斯嘅能源倚賴，現時兗礦逾20%收入來自海外市場。
不過，內地煤價係有價格限制，而喺「雙碳」政策下，仍以發展清潔能源為主軸，想長揸嘅投資者都要留意呢啲風險因素。
