【now.com財經】今朝唔知做乜，做做吓嘢忽然左手手指尾最後嗰一節有啲痺痺地嘅感覺，又唔係話好痛但又未至於Feel唔到「麻」，搞到今日打字都慢兩拍；作戰室一眾戰友同我家老爺都擔心我隻手指尾，but…So far我郁到呀...(好啦，再係咁我會睇醫生，Google search到話係中風先兆嘛；又可能我壓住咗隻手呢，咪嚇我啦)
今朝揀咗隻恒指熊(51646)出嚟，同時都Set咗個買入訊號以五分鐘圖上嘅保歷加通道中軸作為量度線，穿得到過去先至出隻熊仔。可惜呢注熊真係生不逢時，喺今朝11點15分的確見到指數喺五分鐘圖上失守保歷加通道中軸，(51646)落場訊號即時出現，以11點15分起計10分鐘入隻(51646)的話，以期內高低位做過0.068元/0.06元計，平均買入價為0.064元。買入之後，指數喺11點半已經二話不說地上破返條保歷加通道中軸，一入即坐唔係最可怕，最可怕係一入即轉勢。
本以為五分鐘圖上見保歷加通道口唔拓闊，都仲可以捱得返指數向下，午前指數有一半身跌咗落去保歷加下降通道；午後指數已經鯉魚翻身般重上保歷加上升通道，不得不服輸，(51646)唯有止蝕離場，以下半場開市首10分鐘走(51646)計，期內高低位做過0.061元0.053元，平均走佬價為0.057元，平均蝕幅為10.94%。真撞鬼，呢兩個月都玩得麻麻，做嚟做去都係得個吉；還是未入肉所以要還神？定係關我今日隻手指尾事呀？
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
想入作戰室？Click呢度就得：https://www.patreon.com/cbbcwar
