【Now財經台】萬國數據(09698)係第2季表現最差嘅科指成分股,今朝低開逾4%後,跌幅一度擴大至逾9%,低見26.5元,其後跌幅收窄。
萬國喺港股今朝開市前出咗第1季業績,上季淨虧損擴大,毛利率及經調整毛利率按年及按季都要跌,而新定單表現亦麻麻,股價今日嘅表現,反映市場唔收貨。
萬國股價由上年2月高位118.7元一直碌落嚟,到今年3月仲跌至18.9元嘅上市新低,萬國暫時係第2季以來表現最差嘅科指成分股,暫時已累跌31%,但股價今個月喺25元水平搵到支持,投資者短期要密切留意公司喺美國「預定除牌名單」事件有冇進展。