【now.com財經】今朝揀咗隻恒指熊(50980)出嚟，目標其實係想見小時圖指數落到50小時線(小時線50線)水平左右，以今朝Patreon出文大約10點15分左右，當時10小時線水平就大約喺19,965點附近，而指數最低已經見過19,949點，換言之指數已經落到去差唔多同目標價相近嘅位置，作戰室因為可以即時一齊Trade，所以幾位戰位喺10點半左右都先後收割朝早出嘅第一注淡倉，奈何透過呢個專欄嘅朋友見到時已經到目標價，再硬生出淡倉同鬥氣無分別。
上半場見指數低開低走後，喺失20,000點後似乎已經達標，所以指數喺五分鐘圖上見，大約10點40分已上破返50分鐘線(五分鐘圖10線)而反方向高走，至臨完上半場前見指數踩得住50分鐘線再上，只係上方有250分鐘線(五分鐘圖50線)頂住，擔心指數咁樣被兩條天線夾住會動彈不得，所以未有貿然開出好倉(當然，作戰室有戰友率先開出好倉等指數上破250分鐘線，無所謂，反正喺作戰室內動作係最快)。
今日喺綠債首日掛牌，我身邊都有唔少朋友入咗飛，包括大家可能久違聽到嘅戰友Jack，仲有我一班中學同學，戰友Jack身經百戰，但都不禁倒抽幾口涼氣；我班中學同學就正囉，先唔好理佢哋成日話我買輪證係「旁門左道」(佢哋從來都唔玩涉及槓桿成份嘅嘢)，繼而係由噚日暗盤開始成個Whatsapp group裡面有過半數(2/3左右啦)嘅人「媽」聲四起至今朝，就係鬧爆隻綠債，但言談間我覺得個內容都幾好笑：「人做債券，你做債券，做到你暗盤已經開始跌嘅？你係咪未上就準備到期呀？」「我諗住幫補下阿仔啲書薄費同補習錢架嘛，咁依家即係點先？「啲有槓桿嘅『邪道』已經避開啦，正正經經買債券啦，仲要政府出嘅，咁都要輸？」「阿珊你有無入到飛呀？」「無呀，今朝掛住出熊仔咋...」「邪不能勝正呀！」我班同學多可愛♥。
午後返嚟見指數喺五分鐘圖本身都好地地踩住條50分鐘線，不過可能面對咁大嘅沽壓(唔係綠債呀)，所以依家1點24分，再次見到指數向後退返落去100分鐘線(五分鐘圖20線)附近，反正保歷加通道仍然收窄中，有無貨在手都好，暫時都未有作為。
望下美股先，本以為前晚三大指數都上得返10天線以上位置可以做得好少少，但數過道指原來四連升，真係數漏呢樣嘢，近來的確好少見到道指連開「四鋪莊」或以上，怪不得噚日開「閒」出嚟。
日線圖上見道指「大陰燭」向下插落去，保歷加通道本來有少少開始收窄，但又止步，見底線無再向上屈上去就知，同時Slow STC(14,3)%K線再次勢頭跌穿%D線，向下走勢似乎又見。不過咁，噚晚美指實在冧得太多，我估計相關啲引伸都已經抽高晒，即使今晚再跌，但如果跌幅唔及噚晚嘅話，指波幅細咗，對輪價都會有影響，但美指目前未有牛熊證上市，既然係咁，就不如試下向看淡(即反向)嘅ETF方向著手。
觀乎目前香港市場上同美指有關嘅看淡ETF產品，追縱嘅就只得納指同標指，未見有道指出現(如果你持有可以Trade美股Account嘅就大把貨揀啦，如Short Dow 30(DOG.US)或者UltraPro Short Dow 30(SDOW.US))。
BTW，若然見納指都係走勢同道指差唔多，同時都相信納指都有咁嘅跌勢的話，FI二華夏納一百(07522)或FI二南方納指(07568)或者可以幫到你。
作者阿珊，任財經/投資版傳媒人十幾年，《鐘擺戰略贏港股》、《輪證基礎筆記》及《傻寶不懂的技術分析》系列作者。用技術分析專心玩輪證，唔貪心，志在搵餐下午茶。
想入作戰室？Click呢度就得：https://www.patreon.com/cbbcwar
