【Now財經台】港股近日回勇，汽車股近期表現亦好搶鏡，但依家跟風追貨，贏面似乎又未必係好大，始終內地封控力度未明顯減弱，而上海汽車協會最新指，4月銷售「清零」，而經銷商資金鏈亦有斷裂風險，但如果投資者真係想博一博，邊隻車股較值博？
獨立股評人莫灝楠建議，投資者投資車股的確要謹慎啲，如果真係想入市，比亞迪股份(01211)可以考慮，因為集團廠房設於南部，疫情對公司嘅影響較細，加上比亞迪有一條自家產業鏈，有鋰電池、生產汽車，以至未完善嘅自動駕駛系統，呢方面係佢嘅優勢。
莫灝楠提醒，唔建議投資者買入新晨動力(01148)，雖然近排股價升咗唔少，但市值細，而且一直蝕緊錢，加上母公司華晨中國(01114)仲停緊牌，又傳出破產消息，佢認為，新晨今輪升勢只係虛火。
