【Now財經台】截至早上11點止，1小時內《彭博》用戶關注度上升最多港股，依次為信達生物(01801)、中國奧園(03883)、京東健康(06618)、美團(03690)及雅居樂集團(03383)。
信達生物股價破底，跌至2019年3月以來嘅逾3年低位，其實今朝其他創新藥、生物製藥以至醫療機械都好弱，係咪因為美國FDA拒批和黃醫藥(00013)嘅抗癌藥上市，導致股價跌到52周低位，拖累呢啲板塊整體投資氣氛？
耀才證券研究部經理譚智樂指，醫療機械板塊過去1年受內地帶量採購政策影響，盈利能力冇市場想像中好，但其實行業上仍然可以好穩定發展，但估值向下嘅空間好大，而創新藥可能一出新產品就遇到帶量採購，未必有暴利空間，加上創新藥及醫療機械有個共通點，就係雖然股價低迷，但估值絕對唔平。佢又提醒，如果成個板塊表現持續負面，投資者要盡量避開估值較貴嘅股份。
