【Now財經台】贛鋒鋰業(01772)噚晚出咗季績,首季收入大升2.3倍,盈利更飆6.4倍,係有紀錄以來最好嘅季績,雖然業績咁靚,但都只係乎合大行預期,不過,贛鋒股價中午前愈升愈多,午後升幅一度擴大至逾14%,高見93.85元,股價升咁多,係咪純粹業績帶挈?
英皇證券研究部總監陳錦興指,贛鋒呢份季績可能乎合大行預期,但對市場嚟講,可能都未必認真準備,因贛鋒股價過去一段時間不斷下試低位,反覆調整,所以冇對業績跟得咁緊,噚晚出咗嚟數字咁強,仲帶動埋A股嘅寧德時代,仲升停板,贛鋒H股亦搶高,反映呢類股份不斷調後,市場似乎有返啲興趣,而贛鋒呢份業績正正係觸發點,帶動一啲短線買盤入返場。