【Now財經台】截至早上11時止，1小時內《彭博》用戶關注度上升最多港股，依次為紫金礦業(02899)、東亞銀行(00023)、中國海外發展(00688)、合景泰富集團(01813)及中國銀行(03988)。
紫金連續第2日上榜，噚日有盈喜消息都炒唔起，反而今日識升，摩笛最新出報告「吹奏」紫金，仲上調目標價，不過，報告冇特別提及行業前景及其他因素，只係話睇住通脹、疫情及地緣因素，又指金價再逼近每盎司1980美元水平，憧憬金價再上，紫金升勢可唔可以持續？
耀才證券研究部經理譚智樂指，無論銅定金，今年都會強勢，因為食正通脹、滯脹兩個主題，銅方面，見到五礦資源(01208)股價近月都升咗唔少，銅股當炒，金礦股又有防守性，所以有貨繼續揸住都冇問題，短線唔使諗「落車位」，因為隨時一走又升返。
