【Now財經台】洛陽玻璃股份(01108)全年業績倒退,單計舊年第4季更要轉蝕,集團解釋,主要受能耗雙控、原材料價格上升等因素影響,洛玻股價今日中午前一度急挫近15%,仲失守過250天線及50周線,係近年半以來首次,係咪反映市場非常不滿呢份業績?
英皇證券研究部總監陳錦興指,洛玻股價大跌主要反映呢份業績比市場預期差,尤其第4季要蝕錢,令人擔心公司係咪成本控制能力差。不過,市場預期今年光伏行業裝機量增長40%,所以光伏玻璃需求應該唔會太差,呢個亦係管理層對今年營運會好轉嘅原因。
股價方面,陳錦興認為,洛玻股價喺250天線有一定支持,事實上,大行對集團嘅中長線睇法冇變,包括產能擴張,加上估值唔係特別高,相信股價喺現水平有一定承接力。