【Now財經台】第五波疫情正面衝擊對本港傳統零售業、餐飲業，2月零售數據今個星期四就會出爐，財爺已預告，零售銷售數據會再度下滑，結束連續12個月嘅升勢。不過，新消費券最快4月初就開始發放，對零售及餐飲股幫助有幾大？
中原資產管理投資總監洪龍荃認為，零售股方面，日本城母公司國際家居零售(01373) 增長穩定之餘，息率又吸引，現價息率超過10厘，因為集團主要賣日用品，加上有網購，所以疫情對公司衝擊唔大，發放消費券後，仲可能會提升銷售額增長。
餐飲股方面，Larry就話，雖然禁咗晚市堂食，但譚仔國際(02217) 仲可逆市有得升，原因係公司外賣佔比唔細，較其他傳統餐飲業有優勢，加上集團剛上市時，市場預期未來派息比率可能去到60%以上，所以都值得留意。
