【Now財經台】截至早上11時止，1小時内《彭博》用戶關注度上升最多港股，依次為小米集團(01810)、海螺創業(00586)、佳兆業集團(01638)、綠城中國(03900)及藥明生物(00909)。
小米噚日收市後出咗業績，上季收入及EBITDA都好過預期，但俄烏戰事及疫情反彈，均打撃智能手機需求及芯片供應，故大和、瑞信下調小米今年智能手機出貨預測，野村更指好難達標。
耀才證券研究部經理譚智樂指，雖然小米業績好過預期，但只係好少少，而小米最近一輪跌浪尾段，都同供應鏈、俄烏局勢有關，而呢啲因素會反映喺今季業績，因此，大行對小米前景睇法審慎。
Arnold又指，小米中長線唔係冇得升，但上升動力會比大市觸底回升嘅力度弱，所以小米可能會跑輸大市，此外，亦唔能夠忽視小米配股風險，由於造車成效及手機出貨都係未知之數，佢認為，小米唔適合做長倉部署。
