【專家分析】中糧家佳康放完榜變「飛天豬」

【Now財經台】內地豬肉商中糧家佳康(01610)中午出咗全年業績，去年少賺17%，收入又跌31%，派息仲要縮水，業績明顯麻麻，但股價下午大幅抽高，一度高見3.4元，大升逾12%，點解股價會咁反應？

紅蟻資本投資經理李澤銘指，如果拆開嚟睇，中糧家佳康上半年賺15億人仔，下半年就賺8億人仔，明顯係倒退咗，不過，對比2020年爆發非洲豬瘟，令內地豬肉供不應求，豬價亦飆升，舊年情況已大大改善，甚至出現供過於求嘅情況，因此，內地年初開始收儲豬肉，減少豬肉流通量，令豬價唔好跌得太過分，即使喺咁嘅環境下，中糧家佳康仍然有錢賺，毛利率仲高過2020年，所以市場對呢份業績都收貨。