【股市脈搏】「潛水艇」昭衍新藥有排捱價

【Now財經台】今日醫療醫藥股強勢，其中昭衍新藥(06127)今朝高開3%，升幅逐步擴大，買盤一度將股價推上66.55元，大升11%，之後成交轉趨淡靜，股價午後喺高位徘徊，暫時成交金額逾1億元，成交量就較過去100日同時段平均增逾2倍。

昭衍新藥出咗業績，全年收入超過15億元，按年升41%，符合盈喜預告，今日大升似乎係因為價殘，純粹跟板塊升。公司上市近1年，首掛當日大幅「潛水」，之後一直上唔返水面，現價仍「深潛」超過55%，今日連業績都出埋，之後都似乎冇乜催化劑，如果行業冇利好因素，股價可能持續弱勢。