【Now財經台】上海實業(00363)持股近50%的A股上實發展旗下附屬有筆應收帳或者收唔到，股價低開後，最多跌5%，收市跌逾3%，報11.42元，成交股數較過去100日同時段平均成交增加逾4倍，涉及逾5300萬元。
開市前上實出通告指最近收到上交所通知，非全資附屬A股上市的上實發展持有70%的上實龍創，未審計應收帳約26億元人民幣，部分涉及融資性貿易或未能收回，公司將繼續內部核查並評估相關金額，有重大發展會進一步公告。
計及公司持股量，應收帳相當約9億元，亦等如上半年盈利四成，如果真係收唔番，對公司業績影響都算大。
公司作為價值股，平日唔多消息，係老牌紅籌綜合企業股，三大業務分別係基建，房地產及煙草，上半年業績理想，收入百多億元升兩成幾，純利在低基數效應下，升1.6倍賺21億人民幣，主要因為房地產及收費公路業務由低基數中復甦，反映業務已由低谷逐步復甦。
公司上市二十幾年，平日成交較淡靜，最大賣點係股份防守性強，相關業務為集團帶來長期穩定的現金流，就算2020年受疫情影響，公司都照派息，去年中期息增加至48仙，現價股息率8厘幾。
今日股價在大成交下跌，但都只係落返去之前橫行兩個幾月的平台區，究竟上日是否屬假突破？消化完負面消息後能否再上衝？要再觀望事件後續發展。
