【股市脈搏】新春假期將至 中通快遞受惠

【Now財經台】大市越升越有，恒指午後升幅擴大至超過600點，物流快遞股繼續有炒作，中通快遞(02057)價量齊升，以高位裂口高開12%，係開市時升幅最大港股，但一開閘升幅就縮一大半，成交股數較過去100日同時段平均成交增加2倍幾。

內地媒體報道，早兩日中通快遞的南寧轉運中心落成，轉運中心提升處理能力。行業的基本因素方面，中通一早表明新春假期期間會加價以抵銷短期成本壓力，對業績實際利好都要再觀察。

物流快遞股連日有追捧，作為行業龍頭的中通快遞上日已經先行炒上，但明顯上到去年雙十一後造出的高位，近260元有阻力，支陰燭都幾大下，睇嚟短期再突破都有難度。