【Now財經台】今日大市特點係殘股翻身，橫行超過三個月的四環醫藥(00460)，今日爆升10%。
公司開市前已經出咗兩份通告，成功推高股價，高開2%，半日升7%。中午時分再出多份通告，股價繼續升，最多升12%，高見1.65元。以接近高位收市，報1.64元，升11%，成交明顯增加至逾1.8億。
今日股價反應理想，其實歸功技術走勢配合，加上遇上大市氣氛改善，睇返今日唔少價殘股有追捧，其實以四環去年高位計，股價都跌咗60%，近月喺1.4至1.8水平打緊底，14天RSI同步背馳，股價反彈唔出奇。
至於另一技術指標，MACD暫時都只係得快線上翻0水平，慢線仍然係負數，轉勢仲有待確認。
