【Now財經台】上周四細價股災中跌得最勁華盛國際(01323)，當日大跌95%後中途停牌，公司上周五收市後出咗份通告，交代主要股東，主席兼CEO的黃偉昇持股降至約19%，執董陳健龍則再冇公司持股，股份今朝復牌竟然大反彈，究竟係點解？
《香港股票財技密碼》作者梁杰文指，通告交代跌市觸發點唔係因為債務問題，或因受監管被調查等震撼消息，而係主要股東被斬倉，相比之下可以理解為好消息。上星期股價曾高見2元樓上，但一跌就跌近97%，就算今日大反彈，股價依然同以前差好遠，相信主要原因係公司股價跌幅太誇張，及接近最低位停牌。在市場解讀除咗斬倉，冇其他負面因素再觸發資金下，如果市況逐漸穩定，可能吸引到進取資金博反彈。
