【Now財經台】歌禮製藥(01672)今朝高開近5%後，買盤湧現，帶動股價一度高見3.9元，勁升逾18%，升勢亦有成交配合，早段成交較過去100日同時段平均飆逾50倍，係半年嚟最多。
歌禮今朝爆升，估計同一個消息有關，集團公布，新冠口服藥利托那韋年產量可擴至1億片，加上兩隻新冠口服藥ASC10、ASC11會分別喺2022年上半年及下半年，向中美提交臨床試驗申請。
雖然歌禮今朝抽升，但睇返公司2018年上市價係14元，股價仍「潛水」逾70%，股價好殘嘅醫藥股上一個交易日大彈，加上Omicron變種病毒繼續肆虐，後市要留意醫藥股相關消息，幫唔幫到歌禮衝破4元關口。
