【Now財經台】港股下半年走勢急轉直下，又跑輸環球指數。如果將恒指喺2008年金融海嘯以嚟上下半年嘅表現拆開比較，發現上半年累升近6%，但下半年就累跌近20%，錄得2015年以嚟最大跌幅，難怪唔少投資者轉戰美股。
不過，華盛証券分析師聶振邦認為，現階段入定港股反而比買美股勝算更大。
聶Sir解釋，今年美股強勢部分原因係受惠於拜登政府嘅經濟刺激政策，但隨著美國通脹不斷升溫，華府未必會維持依家嘅刺激力度，加上市場預期聯儲局明年最少加息4至5次，兩個因素都會影響美股明年表現，反觀港股第3季嘅公司業績較差，第4季業績值得憧憬，因為喺低基數效應下，按季可望錄得顯著增長，繼而刺激股價，帶動大市回升。
至於新股喺年底都有起色，4隻「尾班車」新股百心安(02185)、聖諾醫藥(02257)、泉峰控股(02285)、商湯(00020)仍然喺水面。聶Sir表示，依家大市已經喺低位，下行壓力細咗，預期明年新股好大機會向好。
