【Now財經台】恒指今年暫時累跌近15%，但食品股中國旺旺(00151)唔經唔覺已連升近4個月，最新又被摩笛唱好，股價今日再衝上6年半高位，但大摩只係輕微上調旺旺盈測，加上旺旺已升穿大摩畀嘅目標價，後市會唔會「畏高」？
艾德證券期貨聯席董事陳政深指，旺旺股價有機會回返少少，由第3季尾至今，旺旺由5元水平升上7元，唔同大行都睇好旺旺，因為憧憬明年可以加價，同埋有新銷售渠道，但睇返旺旺半年度嘅業績，毛利率其實受制於原材料價格上漲，嚟緊可以睇吓原材料價格，會唔會因環球貨幣政策緊縮而下跌，但喺依家通脹瀕臨失控、供應鏈受阻下，機會未必好大，而旺旺嘅收入結構亦未必完全適合新銷售渠道。
