【股市脈搏】長建仲有12%水位？

【Now財經台】藍籌長江基建集團(01038)股價4連升，今日更一度衝上年半高位49.35元，升近2%，收市仍升逾1.5%，報49.15元。依家長建及升上5個月高位嘅中電控股(00002)，係僅有14天RSI升到70以上超買水平嘅恒指成分股。

長建股價勢如破竹，可能因為公司上周五罕有以42%溢價，斥資約90億元回購約1.31億股，佔已發行股本約4.94%，每股作價約8.83美元，折合約68.9港元。翻查資料，長建喺2016年向第三方發行同樣規模嘅新股，並訂立掉期協議，可能今次溢價回購屬財務安排，參考作用唔大。

長建股價舊年3月曾跌至30元邊緣，期間250天線仲守得幾穩，綜合大行12個月平均目標價係55元，較現價仲有12%上望空間。